રાવળવાસના અશોક જીતાભાઈ રાવળની ધરપકડ; અઢી વર્ષના નવઘણનો મૃતદેહ FSL અને મામલતદારની હાજરીમાં બહાર કાઢી પોસ્ટમોર્ટમ માટે મોકલાયો
સુઈગામ: સુઈગામના રાવળવાસમાં અઢી વર્ષના બાળક નવઘણની હત્યાના આરોપમાં તેના પિતા અશોક જીતાભાઈ રાવળની ધરપકડ કરવામાં આવી છે. પત્ની રિસામણે હોવાને કારણે બાળકની સંભાળ રાખવામાં મુશ્કેલી અનુભવતા પિતાએ પુત્ર પર પેટ્રોલ છાંટી તેને સળગાવી દીધો હોવાનો ગંભીર આરોપ સામે આવ્યો છે. બાળકના મૃત્યુ બાદ ઘટનાને છુપાવવા મૃતદેહ સ્મશાનમાં દાટી દેવાયો હોવાની વિગતો પણ સામે આવી છે.
બાળકને બોજરૂપ માનવા લાગ્યો હોવાનો આક્ષેપ
પ્રાપ્ત વિગતો મુજબ, અશોકની પત્ની છેલ્લા કેટલાક સમયથી રિસામણે હતી. તેની ગેરહાજરીમાં અઢી વર્ષના પુત્ર નવઘણના ઉછેરની જવાબદારી અશોક પર હતી. બાળકની સંભાળ રાખવી મુશ્કેલ લાગતાં તે પુત્રને પોતાના પર બોજરૂપ માનવા લાગ્યો હોવાનો આક્ષેપ છે. ઘટનાના કારણ અંગે પોલીસ વધુ તપાસ કરી રહી છે.
૧૩ ઓક્ટોબરે બપોરે માસૂમને સળગાવ્યાનો આરોપ
ફરિયાદની વિગતો અનુસાર, ૧૩ ઓક્ટોબર, ૨૦૨૬ના રોજ બપોરે ૧થી ૨ વાગ્યાના અરસામાં અશોકે પોતાના પુત્ર નવઘણ પર પેટ્રોલ છાંટી તેને સળગાવી દીધો હતો. સારવાર મળે તે પહેલાં જ બાળકનું મોત નીપજ્યું હોવાનું જણાવાયું છે.
બાળકના મૃત્યુ બાદ અશોકે ગુનો છુપાવવાના ઇરાદાથી પરિવારજનો સાથે મળીને મૃતદેહને સ્મશાનમાં જમીનમાં દાટી દીધો હોવાનો પણ આરોપ છે. મૃતદેહ દાટવામાં અન્ય વ્યક્તિઓની ભૂમિકા અંગે તપાસ બાદ સ્પષ્ટતા થશે.
કાકા બાબુભાઈ રાવળે ફરિયાદ નોંધાવી
આ ઘટનાની જાણ અશોકના કાકા બાબુભાઈ રાવળને થતાં તેમણે સુઈગામ પોલીસ સ્ટેશનમાં ફરિયાદ નોંધાવી હતી. સોશિયલ મીડિયામાં ઘટનાસંબંધિત એક વીડિયો વાયરલ થતાં મામલો સામે આવ્યો હોવાની માહિતી પણ મળી છે.
ફરિયાદને આધારે પોલીસે તપાસ હાથ ધરી આરોપી પિતા અશોક જીતાભાઈ રાવળની ધરપકડ કરી હતી.
સ્મશાનમાં ખોદકામ કરી મૃતદેહ બહાર કાઢ્યો
તપાસના ભાગરૂપે FSLની ટીમ અને મામલતદારની હાજરીમાં સ્મશાનમાં ખોદકામ કરવામાં આવ્યું હતું. દફન કરાયેલો નવઘણનો મૃતદેહ બહાર કાઢીને પોસ્ટમોર્ટમ માટે મોકલવામાં આવ્યો છે. પોસ્ટમોર્ટમ અને ફોરેન્સિક તપાસના તારણો ઘટનાની તપાસમાં મહત્ત્વના રહેશે.
હત્યા અને પુરાવાનો નાશ કરવાના આરોપમાં કાર્યવાહી
મળતી માહિતી અનુસાર, સુઈગામ પોલીસે અશોક જીતાભાઈ રાવળ વિરુદ્ધ ભારતીય ન્યાય સંહિતા (BNS)ની કલમ ૧૦૩(૧) અને કલમ ૨૩૮ હેઠળ હત્યા તથા પુરાવાનો નાશ કરવાના આરોપમાં ગુનો નોંધ્યો છે.
આરોપીએ પોલીસ સમક્ષ ગુનો કબૂલ્યો હોવાનું પણ જણાવાયું છે. પોલીસ ઘટનાક્રમ, હત્યા પાછળનું કારણ અને ગુનો છુપાવવામાં અન્ય કોઈની સંડોવણી છે કે કેમ તે સહિતના મુદ્દે વધુ તપાસ કરી રહી છે.
હજુ કોઈ કોમેન્ટ નથી. પ્રથમ કોમેન્ટ કરો.