મડાણા ખાતે રાજ્ય અનામત પોલીસ દળ (એસ.આર.પી.) જૂથ-૩માં આયોજિત ‘ગુજરાત પોલીસ ડીજીપી કપ-૨૦૨૬’ અંતર્ગત ખો-ખોની પુરુષ અને મહિલા વિભાગની ફાઇનલ મેચો યોજાઈ હતી. મહિલા વિભાગમાં વડોદરા રેન્જ અને પુરુષ વિભાગમાં આર્મડ યુનિટની ટીમે વિજેતાપદ મેળવ્યું હતું. રાજ્યના વન અને પર્યાવરણ, ક્લાઈમેટ ચેન્જ તથા વાહન વ્યવહાર રાજ્ય મંત્રી પ્રવીણભાઈ માળીએ વિશેષ અતિથિ તરીકે ઉપસ્થિત રહી ખેલાડીઓનો ઉત્સાહ વધાર્યો હતો.
ગુજરાત પોલીસ દળમાં ખેલદિલી, શારીરિક સજ્જતા અને પરસ્પર સમન્વયની ભાવના મજબૂત કરવાના હેતુથી યોજાયેલા આ ટુર્નામેન્ટમાં કબડ્ડી ક્લસ્ટર હેઠળ કબડ્ડી, ખો-ખો, જિમ્નાસ્ટિક્સ અને ફેન્સિંગની સ્પર્ધાઓનું આયોજન કરવામાં આવ્યું હતું.
મહિલાઓમાં વડોદરા રેન્જનો વિજય, પુરુષોમાં આર્મડ યુનિટનો દબદબો
મહિલા ખો-ખોની ફાઇનલમાં વડોદરા રેન્જની ટીમે અમદાવાદ રેન્જ સામે ઝડપ અને મજબૂત રણનીતિનું પ્રદર્શન કરીને વિજય મેળવ્યો હતો. પુરુષ વિભાગની ફાઇનલમાં આર્મડ યુનિટ અને જેલ વિભાગ વચ્ચે મુકાબલો જામ્યો હતો. આર્મડ યુનિટની ટીમે શરૂઆતથી જ દબદબો જાળવી રાખીને ચેમ્પિયન ટ્રોફી પોતાના નામે કરી હતી.
મંત્રી પ્રવીણભાઈ માળીએ મેદાનમાં સિક્કો ઉછાળી ફાઇનલ મુકાબલાનો પ્રારંભ કરાવ્યો હતો. ત્યારબાદ તેમણે મેચ નિહાળી પોલીસ જવાનો અને ખેલાડીઓને પ્રોત્સાહિત કર્યા હતા.
SDRFના સાધનો અને બચાવ કામગીરીના પ્રદર્શનનું નિરીક્ષણ
આ મુલાકાત દરમિયાન મંત્રીશ્રીએ જૂથ-૩ મડાણાના સ્ટેટ ડિઝાસ્ટર રિસ્પોન્સ ફોર્સ (SDRF) યુનિટ દ્વારા રજૂ કરાયેલા આપત્તિ વ્યવસ્થાપનનાં સાધનો અને ફિલ્ડ કામગીરીના પ્રદર્શનનું નિરીક્ષણ કર્યું હતું.
કુદરતી કે માનવસર્જિત હોનારતોમાં બચાવ કામગીરી માટે ઉપયોગમાં લેવાતાં આધુનિક સાધનો તથા ઇમરજન્સી લાઇટિંગ સિસ્ટમ અંગે તેમણે સૂચનો આપ્યાં હતાં. સાથે જ કટોકટીના સમયે ત્વરિત કામગીરી માટે ડિઝાસ્ટર ટીમને માર્ગદર્શન આપ્યું હતું.
વિજેતા ટીમોને અભિનંદન, ટેકનિકલ અધિકારીઓનું સન્માન
મેચ પૂર્ણ થયા બાદ સેનાપતિ દિનેશસિંહ ચૌહાણે વિજેતા ટીમોના ઉત્કૃષ્ટ પ્રદર્શનને બિરદાવી શુભકામનાઓ પાઠવી હતી. મદદનીશ સેનાપતિ આર. એલ. ડાંખરાએ ખો-ખો સ્પર્ધાની ટેકનિકલ ઓફિશિયલ ટીમને સ્મૃતિચિહ્ન અર્પણ કર્યાં હતાં અને સ્પર્ધાનું સુચારુ તથા પારદર્શક સંચાલન કરવા બદલ આભાર વ્યક્ત કર્યો હતો.
આ વિગતો રાજ્ય અનામત પોલીસ દળ, જૂથ-૩, મડાણાના પોલીસ વાયરલેસ ઇન્સ્પેક્ટર દ્વારા જાહેર કરાયેલી અખબારી યાદીમાં જણાવવામાં આવી હતી.
હજુ કોઈ કોમેન્ટ નથી. પ્રથમ કોમેન્ટ કરો.