અમદાવાદમાં ટ્રાફિક અને માર્ગ સુરક્ષાની કથળતી સ્થિતિ અંગે સુઓમોટો સુનાવણી દરમિયાન ગુજરાત હાઈકોર્ટના એક્ટિંગ ચીફ જસ્ટિસની બેન્ચે સરકાર અને પોલીસ તંત્રની કામગીરી સામે ગંભીર સવાલો ઉઠાવ્યા હતા.

પાંજરાપોળ ચાર રસ્તા પર ફ્લાયઓવર બ્રિજ અને વધતી ટ્રાફિક સમસ્યા અંગે કોર્ટે સરકાર પાસે ખુલાસો માગ્યો હતો.

હેલ્મેટના નિયમોના અમલ અંગે નારાજગી વ્યક્ત કરતાં કોર્ટે સવાલ કર્યો કે અન્ય રાજ્યોમાં વાહનચાલક અને પાછળ બેસનારા બંને માટે હેલ્મેટનો અમલ થાય છે, તો ગુજરાતમાં કેમ થતો નથી? ડમ્પર અને ટુ-વ્હીલર વચ્ચે જીવલેણ અકસ્માતો તથા નંબર પ્લેટ વિના દોડતા ડમ્પરો અંગે પણ કોર્ટે ચિંતા વ્યક્ત કરી હતી.

ચાલુ વાહને મોબાઈલ પર વાત કરવી, વીડિયો કૉલ કરવો અને ડેશબોર્ડ પર મોબાઈલ મૂકીને ફિલ્મ જોતા ડ્રાઈવિંગ કરવા જેવી જોખમી પ્રવૃત્તિઓ સામે કાર્યવાહી ન થતી હોવા અંગે કોર્ટે પોલીસને ટકોર કરી હતી.

બીજા રાજ્યોમાંથી આવતા જજો પણ ગુજરાતની સ્થિતિ જોઈને આશ્ચર્ય વ્યક્ત કરતા હોવાનું જણાવી, હાઈકોર્ટે આવા જોખમી ટ્રેન્ડ તાત્કાલિક બંધ કરાવવા નિર્દેશ કર્યો હતો.