સતત ત્રીજા વર્ષે યોજાયેલા ‘ફાઇવ સ્ટાર’ સેવા કેમ્પ બાદ સમગ્ર ટીમે મા અંબાના દર્શન કર્યાં; દાતાઓ, સ્વયંસેવકો અને સહયોગીઓનો આભાર વ્યક્ત કર્યો
અંબાજી/વડગામ: ભાદરવી પૂનમના પાવન અવસરે મા અંબાના દર્શને જતા શ્રદ્ધાળુઓ અને પદયાત્રિકોની સેવા માટે પી.એન. માળી ફાઉન્ડેશન દ્વારા આયોજિત ‘ફાઇવ સ્ટાર’ સેવા કેમ્પનું ભાવભેર સમાપન થયું હતું. સતત ત્રીજા વર્ષે યોજાયેલા આ કેમ્પની પૂર્ણાહુતિ બાદ ફાઉન્ડેશનની સમગ્ર ટીમે દાંતાથી અંબાજી સુધી પગપાળા યાત્રા કરી હતી. અંબાજી મંદિરે પહોંચીને ટીમના સભ્યોએ મા અંબાને ધજા ચઢાવી, શીશ ઝુકાવી ભાવપૂર્વક દર્શન કરી આશીર્વાદ મેળવ્યા હતા.
ઘોરી ખાતે યાત્રાળુઓની સેવાનો યજ્ઞ
વડગામ તાલુકાના ઘોરી મુકામે અંબાજી હાઇવે પર બસ સ્ટેન્ડ નજીક પી.એન. માળી ફાઉન્ડેશનની ‘ફાઇવ સ્ટાર’ ટીમ દ્વારા સેવા કેમ્પનું આયોજન કરવામાં આવ્યું હતું. ભાદરવી પૂનમ દરમિયાન મોટી સંખ્યામાં ભાવિકો પગપાળા અંબાજી જતા હોય છે. આવા યાત્રાળુઓની સેવા અને સુવિધા માટે ટીમે સમર્પણભાવ સાથે કામગીરી કરી હતી.
સતત ત્રીજા વર્ષે યોજાયેલા આ કેમ્પમાં સંચાલકો, સ્વયંસેવકો અને સહયોગીઓએ સેવા કાર્યને એક સેવા યજ્ઞ તરીકે નિભાવ્યું હતું. કેમ્પને સફળ બનાવવા પી.એન. માળી પરિવાર–ડીસા તથા સમગ્ર ટીમે ભારે જહેમત ઉઠાવી હતી.
દાંતાથી અંબાજી સુધી પગપાળા યાત્રા
સેવા કેમ્પ પૂર્ણ થયા બાદ પી.એન. માળી ફાઉન્ડેશનની ટીમે દાંતાથી અંબાજી સુધી પદયાત્રા કરી હતી. આ યાત્રામાં ડીસાના વતની અને સેવાભાવી પી.એન. માળી, તેમના સુપુત્ર અક્ષયરાજભાઈ પી. માળી સહિત ફાઉન્ડેશનના સભ્યો જોડાયા હતા.
મા અંબાના પવિત્ર ધામમાં પહોંચ્યા બાદ સૌએ ધજા ચઢાવીને ભાવપૂર્વક દર્શન કર્યાં હતાં. યાત્રાળુઓની સેવા બાદ માતાજીના ચરણોમાં શીશ ઝુકાવી ટીમના સભ્યોએ ધન્યતા અનુભવી હતી.
નાયબ મુખ્યમંત્રી હર્ષભાઈ સંઘવીનું સ્વાગત
આ પ્રસંગે ભાજપના બક્ષીપંચ મોરચાના ગુજરાત પ્રદેશ મંત્રી પી.એન. માળીએ ગુજરાતના નાયબ મુખ્યમંત્રી હર્ષભાઈ સંઘવીનું ઉષ્માભેર સ્વાગત કરીને શુભેચ્છાઓ પાઠવી હતી.
સહયોગીઓનો આભાર અને સમાજસેવાનો સંકલ્પ
સેવા કેમ્પની સફળ પૂર્ણાહુતિ બદલ ફાઉન્ડેશન દ્વારા પ્રત્યક્ષ કે પરોક્ષ રીતે સહયોગ આપનાર તમામ સભ્યો, દાતાઓ, સ્વયંસેવકો અને સહયોગીઓનો હૃદયપૂર્વક આભાર વ્યક્ત કરવામાં આવ્યો હતો.
ફાઉન્ડેશને આગામી સમયમાં પણ સમાજસેવાના કાર્યો સતત ચાલુ રાખવાનો સંકલ્પ વ્યક્ત કર્યો હતો. સેવા, સંકલ્પ અને સમર્પણની ભાવના સાથે સમાજના દરેક વર્ગ સુધી પહોંચવાની પ્રેરણા લઈને પી.એન. માળી ફાઉન્ડેશનની ટીમ સેવા પ્રવૃત્તિઓમાં અગ્રેસર રહેવા પ્રતિબદ્ધ હોવાનું જણાવાયું હતું.
CENTRAL BHARAT NEWS |CBN LIVE MEDIA
હજુ કોઈ કોમેન્ટ નથી. પ્રથમ કોમેન્ટ કરો.