પાટણના જાખા ગામેથી 85 વર્ષનાં વૃદ્ધા ગુમ: ત્રણ દિવસથી ભાળ નહીં, પરિવારે પોલીસની મદદ માગી
સગાં-સંબંધીઓ અને આસપાસનાં ગામોમાં શોધખોળ છતાં પત્તો ન મળ્યો; ઘરેથી નીકળ્યાં ત્યારે પગમાં ચંપલ પણ નહોતાં
પાટણ જિલ્લાના સરસ્વતી તાલુકાના જાખા ગામેથી 85 વર્ષનાં બબીબેન, ચુનાજી ઠાકોરનાં પત્ની, ગુમ થયાનો બનાવ સામે આવ્યો છે. તા. 3 ઓક્ટોબર, 2026ના રોજ બપોરે આશરે 3થી 4 વાગ્યા દરમિયાન તેઓ ઘરેથી નીકળ્યાં હતાં. ત્યારબાદ પરત ન ફરતાં પરિવારજનોએ શોધખોળ હાથ ધરી હતી. ત્રણ દિવસથી તેમની ભાળ ન મળતાં પરિવારજનોએ વાગડોદ પોલીસ મથકે જાણ કરી મદદ માગી છે.
પોલીસમાં કરાયેલી જાણ મુજબ, બબીબેન પરિવાર સાથે રહેતાં હતાં. તેઓ માનસિક રીતે અસ્થિર હોવાથી અગાઉ પણ ઘરેથી નીકળી જતાં હતાં. ત્યારે પરિવારજનો તેમને શોધીને પરત લાવતાં હતા. પરંતુ આ વખતે શોધખોળ કરવા છતાં તેમનો પત્તો મળ્યો નથી.
પરિવારજનોએ આસપાસનાં વિસ્તારો, ગામો અને સગાં-સંબંધીઓને ત્યાં તપાસ કરી હતી. સગાં-સંબંધીઓએ પણ શોધખોળમાં મદદ કરી હતી, છતાં બબીબેનની ભાળ મળી નહોતી. આખરે તા. 6 ઓક્ટોબરના રોજ વાગડોદ પોલીસ મથકે ગુમ થયાની જાણ નોંધાવવામાં આવી હતી.
ઓળખ માટેની વિગતો
પરિવારની જાણ મુજબ, બબીબેન શરીરે મધ્યમ બાંધાનાં અને ઘઉંવર્ણનાં છે. ઘરેથી નીકળ્યાં ત્યારે તેમણે પગમાં ચંપલ પહેર્યાં નહોતાં. તેમની ઉંમર અને માનસિક સ્થિતિને કારણે પરિવારજનો ચિંતિત છે.
ગુમ થયાં અંગેની જાણમાં કોઈના પર શંકા વ્યક્ત કરવામાં આવી નથી. પરિવારજનોએ બબીબેનને શોધી આપવા પોલીસ સમક્ષ વિનંતી કરી છે.
બબીબેન અંગે કોઈ માહિતી મળે અથવા તેઓ ક્યાંય જોવા મળે તો વાગડોદ પોલીસ મથકને જાણ કરવા અપીલ છે.
હજુ કોઈ કોમેન્ટ નથી. પ્રથમ કોમેન્ટ કરો.