બનાસકાંઠા જિલ્લાના ભીલડી ખાતે બનાસ ડેરી દ્વારા ₹૩૨૫ કરોડના ખર્ચે તૈયાર કરાયેલા અત્યાધુનિક ‘ભારત બોવાઇન બ્રીડિંગ એન્ડ રિસર્ચ સેન્ટર’ (BBBRC)નું વડાપ્રધાન નરેન્દ્ર મોદી આગામી ૩૦ ઓક્ટોબર, ૨૦૨૬ના શુક્રવારે લોકાર્પણ કરશે. આ મુલાકાત દરમિયાન બનાસ ડેરીનાં પાંચ મોટા વિકાસ કાર્યોનું લોકાર્પણ અને ખાતમુહૂર્ત કરવામાં આવશે.
૧૨૭ એકરમાં વિકસાવાયેલું આ કેન્દ્ર નેશનલ ડેરી ડેવલપમેન્ટ બોર્ડના ટેકનિકલ માર્ગદર્શન અને કેન્દ્ર સરકારના ‘રાષ્ટ્રીય ગોકુળ મિશન’ની સહાયથી તૈયાર થયું છે. દેશી પશુઓની ઓલાદ સુધારવા અને દૂધ ઉત્પાદન વધારવાની દિશામાં આ કેન્દ્ર મહત્ત્વપૂર્ણ ભૂમિકા ભજવશે તેમ બનાસ ડેરીએ જણાવ્યું છે.
વિધાનસભાના અધ્યક્ષ અને બનાસ ડેરીના ચેરમેન શંકરભાઈ ચૌધરીએ જણાવ્યું કે, કેન્દ્રમાં OPU-IVF અને ગર્ભ પ્રત્યારોપણ જેવી આધુનિક પ્રજનન પદ્ધતિઓનો ઉપયોગ થશે. આ તકનીકો દ્વારા શ્રેષ્ઠ ગાયમાંથી એક વર્ષમાં અનેક વાછરડાં મેળવવાનું શક્ય બનશે. કેન્દ્રમાં દર વર્ષે ૨૫,૦૦૦ ઉત્તમ એમ્બ્રિયો તૈયાર કરવાનો લક્ષ્યાંક રાખવામાં આવ્યો છે.
દેશી ગાય અને ભેંસોની ઓલાદ સુધારાશે
ભીલડી કેન્દ્રમાં કાંકરેજ, ગીર, સાહીવાલ અને થારપારકર જેવી દેશી ગાયો તથા મહેસાણી, બન્ની, જાફરાબાદી અને મુર્રાહ જેવી ભેંસોની ઓલાદ સુધારવા કામગીરી હાથ ધરાશે. ઘટતી ચરિયાણ જમીન અને પશુપાલનના વધતા ખર્ચ વચ્ચે ‘ઉત્તમ પશુ, વધુ ગુણવત્તાવાળાં પશુ અને વધુ દૂધ’નો અભિગમ કેન્દ્રસ્થાને રહેશે.
શંકરભાઈ ચૌધરીના જણાવ્યા પ્રમાણે, આ કેન્દ્ર શ્વેત ક્રાંતિમાં આધુનિક વિજ્ઞાનનો નવો અધ્યાય ઉમેરશે અને દેશી ગૌવંશ સંવર્ધન ક્ષેત્રે વૈશ્વિક સ્તરે નવી દિશા ચીંધશે.
નાના પશુપાલકો અને ગ્રામીણ મહિલાઓને લાભ પહોંચાડવાનો ઉદ્દેશ
ડેરીના કામમાં ૭૦ ટકા ફાળો આપતી ગ્રામીણ બહેનો અને નાના પશુપાલકો સુધી કેન્દ્રનો લાભ પહોંચાડવાનો ઉદ્દેશ છે. કેન્દ્ર મારફતે રોગમુક્ત અને ઉત્તમ ઓલાદના સાંઢ, ગુણવત્તાવાળું સીમેન તથા સસ્તા દરે સારા ગર્ભ પશુપાલકોના ઘરઆંગણે ઉપલબ્ધ કરાવવાનું આયોજન છે.
બનાસ ડેરીના જણાવ્યા અનુસાર, આ પ્રયાસોથી દૂધ ઉત્પાદન ખર્ચ ઘટાડવામાં, દૂધમાં ફેટનું પ્રમાણ વધારવામાં અને પશુપાલક પરિવારોની આવક વધારવામાં મદદ મળશે. સહકારી સંસ્થા, વૈજ્ઞાનિક માર્ગદર્શન અને સરકારી સહાયના સમન્વયથી વિકસાવાયેલું ભીલડીનું આ કેન્દ્ર સમગ્ર દેશ માટે રોલ મોડલ બનશે તેવી અપેક્ષા વ્યક્ત કરવામાં આવી છે.
હજુ કોઈ કોમેન્ટ નથી. પ્રથમ કોમેન્ટ કરો.